--- title: Opening, part 7 — Negro myths from the Georgia coast, told in the… · full text with trees · page 2 description: Opening, part 7, «Negro myths from the Georgia coast, told in the vernacular» by Charles C., Jr. Jones: the whole chapter, every sentence with its dependency tree and pragmatics. It begins: De rale name er dis cunjur man bin _Robin_, but him yent bin gib dis name ter de King. --- [Mova](https://md.mova.elamur.ai/free/en/) · [this page in HTML](https://mova.elamur.ai/free/en/corpora/tales/pg76586/7/page/2/) [home](https://md.mova.elamur.ai/free/en/) / [corpora](https://md.mova.elamur.ai/free/en/corpora/) / [tales](https://md.mova.elamur.ai/free/en/corpora/tales/) / [Negro myths from the Georgia coast, to…](https://md.mova.elamur.ai/free/en/corpora/tales/pg76586/) / Opening, part 7 # Opening, part 7 · page 2 [1](https://md.mova.elamur.ai/free/en/corpora/tales/pg76586/7/) **2** Wen de compny bin er march wid de dead body er de tief een de cart, jes es dem come befo de do er de house way Buh Fox lib, wuh bin marry Buh Roccoon darter, him wife bin er look outer de winder, an eh see eh pa han duh heng ober de side er de cart, an eh know um, an eh holler an scream an fall down an faint way.[55](../../55/ "tree and pragmatics") Den de soldier wuh bin on de right han side er de cart, dem run ter de house way dem yeddy de screamin an de hollerin, an dem bus een de do an gone een fuh kill de whole fambly.[56](../../56/ "tree and pragmatics") Buh Fox, wen eh see wuh happne, tek one knife an eh cut off one er him finger, an eh run to de do, an eh meet de soldier, an eh show um eh han der bleed, an eh tell um say eh bin dis loose one er eh finger, an eh wife dat scade wen eh see wuh happne ter um, dat eh holler an faint way.[57](../../57/ "tree and pragmatics") So Buh Fox fool de soldier, an dem gone back an jine de compny an march on.[58](../../58/ "tree and pragmatics") Dat night dem camp een de en er de street, an halfer de soldier bin on one side de cart, an tarruh half bin on tarruh side duh guade de body er de tief wuh head cut off.[59](../../59/ "tree and pragmatics") Wen Buh Fox wife come teh, eh spicion say Buh Fox bin know who kill eh pa,--wuh bin Buh Roccoon,--an eh tell eh husbun, Buh Fox, say ef eh dont git eh pa body an bring um ter um dat berry night, eh gwine tell Buh Lion him bliebe de one wuh cut eh farruh--Buh Coon--head off an hide um, duh eh own husbun,--Buh Fox.[60](../../60/ "tree and pragmatics") Buh Fox tell um say him yent know nuttne bout de ting, an eh try fuh swade um no fuh go nigh Buh Lion.[61](../../61/ "tree and pragmatics") Wen eh fine eh wife mine done mek up, an no way fuh him fuh git out cept fuh fetch Buh Coon body ter eh wife, eh gone ter Buh Rabbit fuh vise um an fuh help um.[62](../../62/ "tree and pragmatics") Buh Rabbit, him yeddy all wuh Buh Fox hab fuh say, an den eh say: “Me tell you wuh you do.[63](../../63/ "tree and pragmatics") To-night gwine cole.[64](../../64/ "tree and pragmatics") Dem soldier duh camp der street, an dem yent hab no fire.[65](../../65/ "tree and pragmatics") Dem berry lub rum.[66](../../66/ "tree and pragmatics") Bout middle night you tek you horse an you paint one side er um white, an de tarruh side er um black.[67](../../67/ "tree and pragmatics") You cahr two jug er rum, an you ride ter de camp, an you gie one jug ter de gang er soldier wuh day on de right, an de edder jug ter de tarruh gang wuh day on de leff, an wen dem drunk you kin tek Buh Coon body outer de cart an cahr um home.”[68](../../68/ "tree and pragmatics") Buh Fox, him wrop him head an yez up so nobody kin know um, an eh paint eh horse one side white an tarruh side black, an eh tek eh two jug er rum an eh ride ter de camp, an eh do dis es Buh Rabbit bin tell um fuh do.[69](../../69/ "tree and pragmatics") De soldier, dem berry glad fuh git de rum.[70](../../70/ "tree and pragmatics") Dem tink two man fetch um,--one duh ride er white horse, an de edder duh ride er black horse.[71](../../71/ "tree and pragmatics") Dem drink tell dem drunk, an den Buh Fox slip way wid Buh Coon body ter eh wife house, an him an eh wife bury um een de gaden same night onbeknowinst ter ebry body.[72](../../72/ "tree and pragmatics") De nex mornin wen de soldier wake up, de cart day day, but de body done gone.[73](../../73/ "tree and pragmatics") De soldier wuh camp on de leff, dem say de man wuh ride on er white horse mus er tief um; an de soldier wuh camp on de right, dem say de man wuh ride on er black horse him mus er tief um.[74](../../74/ "tree and pragmatics") So Buh Fox cuhfuse dem two gang er soldier, an dem nebber did fine um out.[75](../../75/ "tree and pragmatics") Buh Rabbit, him scheemy mona all dem tarruh cretur.[76](../../76/ "tree and pragmatics") Him do all dis, an yet him stay fren wid Buh Lion, Buh Fox, an wid Buh Coon fambly.[77](../../77/ "tree and pragmatics") XXXIII.[78](../../78/ "tree and pragmatics") BUH RABBIT, BUH WOLF, AN DE PORPUS.[79](../../79/ "tree and pragmatics") Ebber sence dat time wen Buh Wolf ketch Buh Rabbit duh tief water outer him spring, an eh bin tie um ter de spakleberry bush an lick um, Buh Rabbit hate Buh Wolf an mek plan fuh git eben wid um.[80](../../80/ "tree and pragmatics") Dem all two lub fish.[81](../../81/ "tree and pragmatics") Buh Rabbit an Buh Porpus bin good fren, an many er time Buh Porpus blan gie Buh Rabbit some er de fish wuh him der ketch.[82](../../82/ "tree and pragmatics") One day, Buh Porpus, him bin berry lucky een eh fishin, an eh fetch fuh Buh Rabbit mo ner two quart er gannet mullet, and blow um on de bank way Buh Rabbit kin git um dout wet eh foot.[83](../../83/ "tree and pragmatics") Buh Rabbit, him tell um heap er tenky, an eh cahr um ter him house.[84](../../84/ "tree and pragmatics") Befo eh part compny wid Buh Porpus, eh tell um how Buh Wolf bin ketch um an tie um an lick um, how eh bex long Buh Wolf, an how eh want Buh Porpus fuh help um fuh punish Buh Wolf.[85](../../85/ "tree and pragmatics") Den dem mek plan lucker dis: Buh Porpus bin fuh come back ter de same place nex day an leh Buh Rabbit tie grapewine roun um, so Buh Wolf kin pull um outer de water fuh eat um.[86](../../86/ "tree and pragmatics") Wen Buh Wolf tek eh holt fuh pull Buh Porpus outer de water, den Buh Porpus wus teh mek eh flut an juk Buh Wolf een de ribber an drown um.[87](../../87/ "tree and pragmatics") So dey gree, an Buh Rabbit gone home long eh fish.[88](../../88/ "tree and pragmatics") Wen eh git ter eh house eh sen one er him gal to Buh Wolf house fuh tell um him hab some nice fish, an ter eenwite Buh Wolf an him fambly fuh tek brukwus long um nex mornin.[89](../../89/ "tree and pragmatics") Buh Wolf, him well please, an eh say him an eh fambly gwine come wid pledjur.[90](../../90/ "tree and pragmatics") Dem did come.[91](../../91/ "tree and pragmatics") De fish sweet.[92](../../92/ "tree and pragmatics") Buh Wolf, him an eh wife an eh chillun joy um berry much.[93](../../93/ "tree and pragmatics") Buh Wolf ax Buh Rabbit way eh git de fish, an Buh Rabbit tell um say him fren, Buh Porpus, blan ketch um fur um, an dat him hab er pintment dat berry day wid Buh Porpus.[94](../../94/ "tree and pragmatics") Buh Wolf bague Buh Rabbit fuh leh him go long too, an see ef him couldnt mek rangement wid Buh Porpus fuh fine him een fish.[95](../../95/ "tree and pragmatics") Buh Rabbit say him willin; so dem finish brukwus an gone fuh meet Buh Porpus.[96](../../96/ "tree and pragmatics") Es dem duh gwine Buh Rabbit tell Buh Wolf say Porpus meat berry nice, an eh tink mebbe dem kin ketch Buh Porpus an eat um.[97](../../97/ "tree and pragmatics") Buh Wolf quire: “How you gwine do um?”[98](../../98/ "tree and pragmatics") Den Buh Rabbit, him mek answer: “Me tell you how we gwine wuk dis ting.[99](../../99/ "tree and pragmatics") Me good fren ter Buh Porpus, an wen we git ter de ribber bank me gwine tell Buh Porpus leh we hab er game, an see who kin pull de strongis.[100](../../100/ "tree and pragmatics") Den we will tek er grape-wine an tie um roun Buh Porpus head, an you an me will tek turrer een, an we sholy kin drag Buh Porpus outer de ribber; an wen we git um out eh gwine dead, an we will hab heap er bittle fuh eat.”[101](../../101/ "tree and pragmatics") Buh Wolf, him no bin know de plan wuh Buh Rabbit aready done fix wid Buh Porpus, an so eh gree ter all wuh Buh Rabbit bin say.[102](../../102/ "tree and pragmatics") [1](https://md.mova.elamur.ai/free/en/corpora/tales/pg76586/7/) **2** - ← previous: [page 1](https://md.mova.elamur.ai/free/en/corpora/tales/pg76586/7/) - next →: [Opening, part 8](https://md.mova.elamur.ai/free/en/corpora/tales/pg76586/8/) - ↑ back to [Negro myths from the Georgia coast, told in the vernacular](https://md.mova.elamur.ai/free/en/corpora/tales/pg76586/)